En siu cudisch "Agid!" tracta el ils temas mobbing e violenza denter scolars

(anr/sb) Culla historia fictiva che porta il tetel "Agid!" tracta igl autur Gabriel Derungs ils temas mobbing e violenza denter scolars. Dacuort ha il scolast da Danis prelegiu ella biblioteca a Trun.

Il cudisch romontsch "Agid!" ei cumparius avon strusch in onn e catta dapi lu grond interess. Ella biblioteca a Trun ein affons e carschi serimnai per assister alla prelecziun da Gabriel Derungs (57).

Igl autur ha buca mo tschaffau cun preleger passaschas ord siu cudisch mobein era fascinau ils presents cun cantar las versiuns romontschas da “My Way” da Frank Sinatra e "We Are the World" da Michael Jackson. "El ha ina bellezia vusch e ha capiu da tschaffar tuts presents aschia che mintgin ha cantau il refrain", seregorda la menadra dalla biblioteca Trun Annamaria Pfister. Quella sera seigi l’idea da realisar in cudisch auditiv naschida.

Mobbing pertucca tuts
Suenter la prelecziun ha Gabriel Derungs lantschau ina discussiun e damai ch’il tema ei actuals e pertucca sin ina moda ni l’autra quasi mintgin ei quella stada buna, interessanta e dètg animada. Tgi ha raquintau d’esser vegnius stuschaus a cantun sez pli baul, tgi d’haver mirau tier co auters ein vegni mudergiai e puspei auters han oz affons ch’ein pertuccai. La historia da Gabriel Derungs raquenta d’in scolar turmentau e mudergiau. In buob che vegn stuschaus a cantun e mudergiaus sistematicamein da ses conscolars. El sa buca sedefender ed ughegia buca da raquintar ad enzatgi tgei che schabegia cun el en ed ord scola. Tochen ch’ina conscolara dat finalmein in segn d’alarm che metta en moviment dabia enteifer la classa e meina la finala ad ina viulta. Era sche la historia sco tala ei inventada digl autur, ei ella denton inspirada da situaziuns concretas capitadas el ravugl dalla scola ni naschidas ord discuors cun colleges. Gabriel Derungs ch’ei bab da quater affons e dat dapi rodund 35 onns scola ei staus confruntaus beinenqual ga cun tals problems en sia veta professiunala ed el discuors cun geniturs e collegas.

Agid! Ina historia da Gabriel Derungs.
Da retrer digl autur (tel. 081 941 14 24) ni da librarias e stizuns.