A. Determinaziuns generalas

Art. 1
Sut il num „Biblioteca Trun“ exista ina biblioteca che vegn purtada dalla vischnaunca da Trun.

Art. 2
Las indicaziuns davart persunas, funcziuns e professiuns en quest regulativ serefereschan ad omisduas schlatteinas.

Art.3
La biblioteca intermediescha cudischs e medias d’informaziun, da scolaziun e da divertiment a carschi,
alla giuventetgna ed als affons. Ella presenta quels cudischs ed ulteriurs mieds en ina fuorma plascheivla ed en ina localitad adattada.
Ella survescha ton sco biblioteca da scola sco per emprests publics.

Art. 4
La purschida duei esser varionta e vegnir cumpletada e renovada regularmein,
sinaquei che la biblioteca disponi da cudischs actuals e medias actualas.

Art. 5
La sistematica, la presentaziun, la catalogisaziun e la cudischaziun ston s’adattar alla tecnica generala
dall’Associaziun Svizra da bibliotecas (SAB).


B. Organisaziun

Art. 6
La survigilonza suprema cumpeta alla suprastonza communala, ferton che la survigilonza directa ei surschada alla cumissiun da biblioteca.

Cumissiun da biblioteca

Art. 7
La cumissiun secumpona da mintgamai in delegau dils suandonts gremis dalla vischnaunca da Trun.
- Suprastonza communala
- Cussegl da vischnaunca
- Cussegl da scola
- Cumissiun per fatgs da cultura

Ils delegai vegnan elegi mintga 3 onns el turnus dallas elecziuns communalas e quei dil cussegl da vischnaunca. La cumissiun seconstituescha sesezza. La cau bibliotecara assista allas sedutas dalla cumissiun cun vusch cusseglionta. Ella meina il protocol. Tier egualitad da vuschs dat il president la decisiun e quei senza risguardar sia vusch gia dada.

Art. 8
La cumissiun da biblioteca

- survigilescha tuts fatgs dalla biblioteca
- procura per la publicaziun da plazzas vacantas
- propona l’elecziun dil persunal per mauns dalla suprastonza communala
- relai in reglament da diever (medias) ed ils carnets da duers dil persunal.
- prepara il preventiv annual sco era il rapport da menaschi e presenta tals alla suprastonza communala per approbaziun
- elaborescha ed exequescha en concordanza cun las bibliotecaras in plan da lavur annual
- prepara in reglament per las indemnisaziuns adequatas dalla cau bibliotecara e dallas bibliotecaras per mauns dalla suprastonza.
L’indemnisaziun ei reglada ell’annexa nr.1 da quei regulativ La cumissiun da biblioteca ha la cumpetenza da contrahar
directamein cun autoritads ed instituziuns. Ella ei autorisada da far expensas el rom dil preventiv, approbaus dallas autoritads
communalas. Per damondas da tempra principala drova ei il consentiment dallas instanzas communalas.

Art. 9
La cau bibliotecara meina ensemen cun las bibliotecaras la biblioteca. Lur incaricas e cumpetenzas vegnan fixadas en ils carnets da duers.


C. Diever, localitads e finanziaziun

Art. 10
Mintga habitont sa far diever dalla biblioteca. El ei denton obligaus d’observar il reglament da diever. Plinavon san era habitonts dallas vischnauncas vischinontas e hosps far diever dalla purschida.

Art. 11
Il reglament da diever fixescha las relaziuns denter il client e la biblioteca, en special il dretg da diever dallas medias, il temps d’avertura, il temps d’emprest, las taxas ed ils castitgs.

Art. 12
La vischnaunca metta a disposiziun las localitads necessarias e procura per lur manteniment. Il diever dil local sedrezza tenor il reglament pil diever da stabiliments communals.

Art. 13
Las entradas ordinarias dalla biblioteca secumponan:

- d’ina contribuziun annuala da vischnauncas vischinontas − dalla contribuziun dil cantun
- dallas taxas d’emprest
- da donnaziuns
- dil recav d’arranschaments en favur dalla biblioteca

Art. 14
Las expensas ordinarias secumponan ord: − la cumpra da cudischs e d’indrezs − ils cuosts per material − las indemnisaziuns dallas collaboraturas − las expensas da propaganda

Art. 15
Preventiv e quen dalla biblioteca vegnan integrai el quen communal.

Art. 16
Davart cass da dispeta decida en emprema instanza

- la cumissiun da biblioteca en fatgs che pertuccan lecturs,
- la suprastonza communala en fatgs che pertuccan la cumissiun da biblioteca ed il persunal.

Art. 17
La vischnaunca garantescha per las obligaziuns che seresultan en connex cun la biblioteca, aschinavon che las perscripziuns vegnan observadas. Ils commembers dalla cumissiun e la caubibliotecara portan negina responsabladad finanziala persunala, aschilunsch ch’ei setracta buca da falliments commess sapientivamein.

Art. 18
Quest regulativ da biblioteca ei vegnius approbaus dil cussegl da vischnaunca en la seduta dils 28-08-2006.
El remplazza il regulativ da biblioteca dils 01-06-1996. Quest regulativ passa en vigur ils 01-07-2007.

En num dalla suprastonza communala Trun
Il president Igl actuar Donat Nay Plazi Decurtins 7166 Trun, 29-08-2006